"Кыргыз көмүр" ишканасы төрт айда жарым миллион тонна көмүр казды

Өлкөдө 1-январдан 15-декабрга чейинки аралыкта "Кара-Кече" көмүр кенинен 740 миң тонна көмүр казып алынды. Бул көрсөткүч 2020-жылга салыштырмалуу 243 миң тоннага көп экендигинен кабар берет. Себеби 2020-жылы бир жылда 497 миң тонна көмүр казылган дешти Энергетика министрлигинен.

Энергетика министри Доскул Бекмурзаевдин тапшырмасы менен төрт айдын ичинде жарым миллион тонна көмүр казылып, Бишкек ЖЭБине, бюджеттик мекемелерге жана калкка берилди.

Министр өз сөзүндө калкка көмүр үзгүлтүксүз ташылууга тийиш экенин баса белгиледи.

"Калкты көмүр менен камсыз кылуу үчүн иш үзгүлтүксүз жана активдүү жүрүүдө. Учурда күнүнө 30 техника иштөөдө. Суткасына орто эсеп менен 200гө жакын унаа көмүр ташып жатат. Биз калкты кыштан жылуу алып чыгуу үчүн бар күчүбүздү жумшай беребиз", - деди Доскул Бекмурзаев.

Эске сала кетсек, быйыл көмүрдүн көп көлөмүн "Кыргыз көмүр" жана "Кара-Кече" филиалы камсыздоодо.

Автор: Бактыгүл Момбекова