Ош облусундагы салыктардын жана жыйымдардын жыйналышы боюнча жыйын өттү

Бүгүн, 15-декабрь күнү Ош облусунун 11 айынын план-тапшырмаларынын аткарылышы жана жыл жыйынтыгын натыйжалуу жыйынтыктоо боюнча жыйын болуп өттү. Бул тууралуу аталган облустун өкүлчүлүгүнүн басма сөз кызматынан билдиришти.

Иш-чарага президенттин Ош облусундагы ыйгарым укуктуу өкүлүнүн орун басары Уристем Манапов, тиешелүү облустук мекеме уюмдардын жетекчилери, райондук мамлекеттик администрация башчылары-акимдердин биринчи орун басарлары жана мамлекеттик салык кызматынын райондор боюнча башкармалыгынын жетекчилери катышты.

Күн тартибинде: Ош облусунун 11 айынын план-тапшырмаларынын аткарылышы жана жыл жыйынтыгын натыйжалуу жыйынтыктоону камсыз кылуу маселеси каралды.

Маалымат үчүн: 2021-жылдын январь-ноябрь айларында мамлекеттик бюджетке чегерилүүчү салыктардын жана жыйымдардын облус боюнча болжолдуу планы 2 миллиард 656 миллион 88 миң сом болсо, аткарылганы 2 миллиард 748 миллион 321,3 миң сомду түздү же болжолдуу план 103,5 пайызга аткарылып, мамлекеттик бюджеттин казынасына 92,2 миллион сомго көп чегерилди. Ал эми 2020-жылдын тиешелүү мезгилине салыштырганда 843,8 миллион сомго жогорулап, өсүү ыргагы 144,3 пайызга жетти.

Жыйынтыгында, жылды жакшы жыйынтыктоо боюнча бардык чараларды көрүү жана өнөр-жай ишканалардын өндүргөн өндүрүүсүн анализдеп, керектүү учурларда постторду уюштуруу тапшырмасы берилди.

Автор: Жылдыз Джускембаева