"Лейлекте белгисиз адамдар унааларды таш бараңга алды" деген маалымат текшерилди

"16-декабрда Баткен облусунун Самаркандек айылында белгисиз адамдар өтүп бара жаткан унааларды таш бараңга алышкан" деген аудио тараган. Мамлекеттик чек ара кызматы аудио жазууну текшергенин, маалымат чындыкка дал келбей турганын кабарлайт.

"Лейлек жол тилкесинде унааларга таш ыргытты, эки өлкөнүн чек ара өкүлдөрүнүн жолугушуусу болду, чек арага жакын аймактардын калкы менен иш алып баруу болгон деген аудиодогу маалымат тастыкталган жок. Мындан тышкары аталган жол тилкесинде жүргөн Кыргыз жарандарынан кайрылуулар түшкөн эмес.

Кечээ, 16-декабрда Баткен-Лейлек унаа жолунун Эки-Таш тилкесинде эки республиканын чек ара өкүлдөрүнүн жолугушуусунун жыйынтыгында тараптардын чек ара тозоттору көрсөтүлдү", - дейт мекемеден.

Бүгүн, 17-декабрга карата мамлекеттик чек аранын кыргыз-тажик тилкесинде абал туруктуу экенин кошумчалашты маалымат кызматынан. Чек ара кызматы жарандарды такталбаган маалыматтарды таратпоого, кыргыз-тажик мамлекеттик чек арасындагы кырдаалды курчутпоого жана тиешелүү органдар менен түшүндүрүү иштерин жүргүзүүгө чакырат.

Белгилей кетсек, 16-декабрда Баткен районунун Көчө-Бою аймагында ок атылганы кабарланган. Анда Кыргыз жарандары жүргүзгөн курулуш иштерин Тажикстандын чек арачылары токтотууну талап кылышып, кайым айтышуудан кийин Тажик тарап 4 жолу асманга ок чыгарышканы маалымдалган.

Автор: Бактыгүл Момбекова