Чолпон-Ата шаарында Жусуп Абдрахмановдун эстелиги ачылды

Мамлекеттик катчы Сүйүнбек Касмамбетов бүгүн, 24-декабрда Ысык-Көл облусунун Чолпон-Ата шаарында Жусуп Абдрахмановдун эстелигинин ачылышына катышты. Бул тууралуу президенттин басма сөз кызматынан билдиришти.

Малыматка ылайык, чогулгандар алдында сүйлөп жатып, мамлекеттик катчы өлкөдө кыргыз мамлекеттүүлүгүн түптөөчүлөрүнүн бири, кыргыз элинин чыныгы баатыры Жусуп Абдрахмановдун 120 жылдыгына арналган иш-чаралар жыл бою өткөнүн эске салды. Мындай иш-чаралар кийинки жылдары дагы уланарын айтты.

Ал Абдрахмановдун мамлекеттик ишмердүүлүгүн илимий мекемелерде, ЖОЖдордо изилдеп, доктордук, кандидаттык диссертацияларды даярдашууда.

Мындан сырткары, Сүйүнбек Касмамбетовдун айтымында ноябрь айында Казакстандын Алматы шаарында чыгаан мамлекеттик ишмердин 120 жылдыгына арналган илимий-практикалык конференция болуп өткөн.

«Мен өзүм тарыхчымын. Биз окуп жатканда бул киши тууралуу болгону жарым эле абзац бар эле. Касым Тыныстанов, Зияш Бектенов, Баялы Исакеев, Жусуп Абдрахманов болгон деп эле койчу. Эч ким бул адамдарды даап айта алган эмес. Ал кезде башка доор болгон эле. Улуттук аң сезимди ойготуучу, улуттун негиздөөчүлөрүнүн өмүр баянын окутуу ошол кезде балким опурталдуу болгондур», — деди мамлекеттик катчы.

Ошондой эле кыргызстандыктардын арасында өлкөнүн кызыкчылыктарын баарынан жогору койгон уул-кыздары көп болгонун белгиледи.

Автор: Кенжебай Сатканалиев
Фото: Президенттин басма сөз кызматы