"Сейфти талкалап миллион сомду алышкан". Чүйдө бир нече уурулукка шектелген жарандар кармалды

Чүй облусунун Аламүдүн районунда бир нече уурулукка шектүүлөр кармалышты. Бул тууралуу облустук милициядан билдиришти.

Маалыматка ылайык, 20-декабрь күнү Аламүдүн РИИБине арыз менен А.А. аттуу жаран кайрылып, Төмөнкү Ала-Арча айылындагы үйүнө белгисиз бирөөлөр кирип үйүндөгү сейфти талкалап, 1 миллион 200 миң сом акча каражатын, 300 миң сомдук алтын буюмдарын жана ACER үлгүсүндөгү ноутбугун алып кетишкенин айтып арызданган.

Бул факты катталып, жүргүзүлгөн ыкчам издөө иш-амалдарынын натыйжасында жогорудагы кылмышка шектелип 29 жаштагы А.С., 27 жаштагы Б.Б. жана 22 жаштагы Т.М. аттуу жарандар кармалган.

Сотко чейинки өндүрүш иштеринин жүрүшүндө шектүүлөрдүн жашаган үйүнөн далил буюмдар алынган. Териштирүү учурунда кармалган жарандардын Аламүдүн районунун аймагында дагы 8 уурулук фактыларына тиешеси бар экендиги такталган.

Андан сырткары Ысык-Көл облусунун аймагында дагы 3 фактыга тиешеси бар болуп чыккан. Жогорудагы иштер боюнча териштирүү иштери жүргүзүлүүдө. Кармалган жарандар убактылуу кармоочу жайга камакка алынып, учурда шектүүлөрдүн дагы башка кылмыштарга тиешеси бар же жогу териштирилүүдө.

Автор: Айсалкын Качкынбекова