"Жоолугу менен муунткан". Кара-Сууда күйөөсүнүн колунан көз жумган аялдын өлүмүнүн чоо-жайы

Ош облусунун Кара-Суу районунда унаадан жансыз денеси табылган келиндин күйөөсү окуянын чоо-жайын айтып берди. Бул тууралуу Ош ОИИБинин басма сөз кызматынан билдиришти.

Маалыматка ылайык, 4-январдан 5-январга караган түнү жансыз денеси унаадан табылган келиндин өлүмү сөз талашуудан жаралган жаңжалдан улам орун алган.

Тергөөгө чейинки текшерүүнүн жүрүшүндө, 1983-жылы туулган шектүү М.А. өз көрсөтмөсүндө каза болгон Г.Т. анын экинчи жубайы экендигин айткан. Ошондой эле 2022-жылдын 3-январь күнү пикир келишпестиктин айынан сөз талашып урушкандыгын, 4-январь күнү болжол менен саат 17:00 чамасында аялын алып, унаасы менен Өзгөн шаарына барып, ал жактан кайрадан Ош шаарына карай келе жатып, Фуркат айылына келген учурда экөө сөз талашып урушуп кетишкендигин айткан.

Унаасын талаа тарапка айдап, токтоткондо аялы түшүп, жерден кыш алып урган учурда, аялын колу менен бет тарабына 1-2 жолу уруп, кармаша кетип жерге жыгылган. Ошол учурда аялынын оозун колу менен жаап, жоолугу менен муунтуп, аялы кыймылдабай калганда унаанын арткы орундугуна отургузуп, окуя болгон жерден жөнөп жаткан учурда милиция кызматкерлери келгендигин билдирген.

Бул факты боюнча “адам өлтүрүү” беренеси менен иш козголуп, шектүү убактылуу кармоочу жайга киргизилди. Учурда тергөө иштери уланууда.

Буга чейин Бишкек-Ош унаа жолунда унаанын ичинен аялдын жансыз денеси табылганы айтылган.

Автор: Кенжебай Сатканалиев