"Викрам Рузахуновду дароо коргоп чыкты". Орусиялык саясий ишмер Ходорковский кыргыз бийлигин мисалга алды

Орусиялык коомдук жана саясий ишмер, публицист Михаил Ходорковский музыкант Викрам Рузахунов менен болгон кырдаалга токтолду. Ал кыргыз бийлиги өз жаранын казак күч түзүмдөрүнүн колунан сууруп алгандыгы тууралуу пикирин жазды.

"Казакстанда камакка алынган кыргыз музыканты Рузахунов Бишкекке кайтып келди. Кыргыз бийлиги дароо өз жаранынын укугун коргоп: нота жиберип, кылмыш ишин козгоп, медиа өнөктүгүн өткөрүп, акыры аны бошотуп алышты. София Сапега дагы эле Лукашенконун зынданында отурат. Орус жарандары Путин үчүн өз эмес", - деген пикирин калтырган.

Буга чейин Казакстандагы телеканалдардын биринде баш аламандыкка катышкандардын бири Кыргыз өлкөсүнөн учуп баргандыгын айткан видео көрсөтүлгөн. Андан соң интернет колдонуучулары видеодогу жаран жаз музыканты Викрам Рузахунов экендигин жазышкан.

Бул боюнча Тышкы иштер министрлиги жана ИИМ аталган жарандын кармалышы боюнча жагдайларын тактоого тиешелүү чаралар жүргүзүлүп жатканын билдиришти. Президент Садыр Жапаров, УКМКнын төрагасы Камчыбек Ташиев Викрам Рузахуновдун кармалышы боюнча пикирлерин айтышкан.