ЖКККББнын жетекчисинин орун басарынын жана Эсеп палатасынын аудиторунун дипломдору жасалма деп шектелүүдө

Эки мамлекеттик кызматкердин дипломдору жасалма деп шектелүүдө. Бул тууралуу УКМКнын басма сөз кызматынан билдиришти.

Маалыматка ылайык, мамлекеттик жана муниципалдык кызматкерлердин дипломдорун текшерүү тууралуу президенттин тапшырмасынын алкагында, УКМК тарабынан 2 факты боюнча териштирүү иштери жүрүүдө. Биринчиси Жол кыймылынын коопсуздугун камсыздоо башкы башкармалыгынын жетекчилеринин бири, милициянын полковниги С.Ы.К. Экинчиси Эсеп палатасынын аудиторлорунун бири С.З.А. Алынган маалыматтарга ылайык, алардын бири кадр бөлүмүнө Орусия Федерациясынын жогорку окуу жайларынын биринин «юриспруденция» адистиги тууралуу диплом, экинчиси Касым Тыныстанов атындагы Ысык-Көл мамлекеттик университетинин бухгалтердик эсеп жана аудит адистиги боюнча аяктагандыгы тууралуу диплом алган.

Учурда бул фактылар боюнча тийиштүү материалдар мыйзам чегинде тиешелүү чечим кабыл алуу үчүн УКМК тарабынан каралып жатат.

Өздүк булактардын билдиришинче, диплому жасалма деп шектелип жаткандардын бири Жол кыймылынын коопсуздугун камсыздоо башкы башкармалыгынын жетекчисинин орун басары, полковник Саркулов Ыманалы Кадырбаевич.

Экинчиси болсо Эсеп палатасынын аудитору Сатаев Зарылбек Апасович.

Автор: Жолдубек Качкынбаев