Жүргүнчүнү ээн жакка алып барып муунткан. Чүйдө тоноого шектелип таксист кармалды

Чүйдө такси кызматын көрсөткөн жаран тоноого шектелип кармалды. Бул туурасында облустук ички иштер башкы башкармалыгынан билдиришти.

Маалым болгондой, 3-февралда Аламүдүн РИИБине 36 жаштагы С.А. арыз менен кайрылган. Анда белгисиз жаран ага карата күч колдонуп, эс-учун жоготкон маалда 9600 сом акчасын жана уюлдук телефонун алып качып кеткенин айткан.

"Бул окуядан кийин жабырлануучу 24 миң сом зыянга учураганы такталды. Аталган факты Кылмыштардын бирдиктүү реестрине 206-берене (тоноо) менен катталып, сотко чейинки өндүрүш иши ачылды.

Тергөө иштеринин жүрүшүндө 1997-жылы туулган А.А. шектүү катары колго түшүрүлдү. Ал мурда сот жообуна тартылган. Алдын ала маалыматка ылайык, шектүү таксист болуп иштеп, буюртмаларды алып жүргөн. 3-февралда Бишкектеги көчөлөрдүн биринен С.А. аттуу жаранды жүргүнчү катары унаасына отургузуп, Маевка айылындагы ээн жакка алып барган. Ал жактан таксист жүргүнчүгө кол салып, муунткан. Жабырлануучу эс-учун жоготкондо акчасын жана телефонун алып качып кеткен", - дешет маалымат кызматынан.

Учурда бул кылмыш иши боюнча тергөө амалдары улантылууда.

Автор: Бактыгүл Момбекова
Фото: Чүй ОИИББи