Милиция кызматкерлери Түркиянын эксперттери менен биргеликте машыгуудан өтүштү

Милиция кызматкерлери Түркиянын Ички иштер министрлигинин эксперттери менен биргеликте машыгуудан өтүштү. Бул тууралуу ИИМдин басма сөз кызматынан кабарлашты.

Маалыматка ылайык, 31-январдан 10-февралга чейин ИИМдин "Шумкар" атайын багыттагы полкунун базасында милиция кызматкерлерине Түркиянын Ички иштер министрлигинин эксперттери тактикалык окуу-машыгууларды өткөрүштү. Эки мамлекеттин Ички иштер министрликтеринин жетекчилеринин эки тараптуу макулдашууларынын негизинде массалык башаламандыкты токтотууга, коомдук коопсуздукту, тартипти сактоого багытталган тактикалык иш-чараларды алып барууну үйрөтүү боюнча тактикалык окуу-машыгуулар уюштурулду. Мындай макулдашуунун негизинде ѳткѳрүлүп жаткан машыгуулар ички иштер органдарынын кызматкерлеринин алдына коюлган тапшырманы өз убагында туура, так, кынтыксыз аткаруусунда кѳмѳк болуп, ишмердүүлүгүн жогорулатууга жардам берет.

Автор: Жолдубек Качкынбаев
Фото: ИИМдин басма сөз кызматы