Нарында мал уурулук фактысына шектелген жарандар изи сууй электе кармалды

Нарын районунда уурулук фактысына шектелген жарандар изи сууй электе кармалышты. Бул тууралуу Нарын ОИИБинин басма сөз кызматынан билдиришти.

Билдирүүгө ылайык, 12-февраль күнү Нарын районунун тургуну 1 баш коюн белгисиз адамдар уурдап кетишкенин айтып Нарын РИИБине арыз менен кайрылган.

Бул факты каттоого алынып, ыкчам иликтөө иштеринин жүрүшүндө, жабырлануучунун 1 баш коюн мал базарда бейтааныш кишилерге сатып жаткан жеринен Нарын районунун тургуну, 2003-жылы туулган К.А., 2003-жылы туулган Н.Т. жана 2002-жылы туулган М.А.кармалган. Алар кылган күнөөлөрүн моюнуна алышкан.

Шектүүлөрдүн башка да кылмышка катыштыгы бар же жок экендиги боюнча тергөө амалдары жүргүзүлүп, натыйжада дагы башка 5 уурулук фактысы аныкталган.

Нарын райондук сотунда шектүүлөрдүн баш коргоо чарасы каралып, алар үй камагына чыгарылды.

Автор: Айсалкын Качкынбекова