Чүйдөн уурдалган мал Ысык-Көлдүн базарынан сатылып кеткен. Милиция кызматкерлери кылмышка шектүүлөрдү кармады

Чүйдүн Сокулук районунда мал уурдоого шектүүлөр аныкталып, кармалды. Облустук ички иштер башкы башкармалыгынан кабарлашкандай, шектүүлөр 190 миң сом зыян келтиришкен.

Башкармалыктан кабарлашкандай, 12-февралда Сокулук РИИБине жергиликтүү тургун кайрылган. Анда 1 баш уй жана 2 баш торпогун белгисиз адамдар уурдап кеткенин билдирген. Келтирилген чыгым 190 000 сомду түзөт.

Бул факты Кылмыштардын бирдиктүү реестрине 205-берене (уурдоо) боюнча катталып, сотко чейинки өндүрүш иштери башталды.

"Сотко чейинки өндүрүш ишинин алкагында, кылмышка шектелип 1990-жылы туулган А.Я. жана 1996-жылы туулган А.Р. кармалды. Алар уурдалган малды Ысык-Көл облусуна алып барып, базардан башка адамга сатып жиберишкен. Шектүүлөрдүн бири Ысык-Көлдөн кармалып, убактылуу кармоочу жайга камакка алынды. Экинчиси Чүйдөн кармалды.

Уурдалган мал табылып, ээсине кайтарылды. Учурда сотко чейинки өндүрүш иштери улантылууда", - дешти мекемеден.

Автор: Бактыгүл Момбекова
Фото: Чүй ОИИББинин маалымат кызматы