Ошто опузалоо жолу менен 8 миң доллар талап кылууга шектелген жаран кармалды

Ош облусунда опузалап акча талап кылган жаран кармалды. Бул тууралуу Ош ОИИБинен билдиришти.

Маалыматка ылайык, Ош облусунун Араван районунун жашоочусу 41 жаштагы Ж.М. аттуу жаран 11-январда арыз менен кайрылган. Анда ал ага тааныш болбогон З.И. аттуу жаран өзүнүн шериктери менен бирге эч себепсиз коркутууларды жасап, опузалап 8 миң доллар акча каражатын талап кылып жаткандыгын билдирген.

Бул факты 11-январда Кылмыштардын жана жоруктардын бирдиктүү реестрине катталып, 208-берененин негизинде кылмыш иши козголуп, тергөө иштери башталган. Ош ОИИБинин кызматкерлери тарабынан жүргүзүлгөн ыкчам иш-аракеттеринин жүрүшүндө, 16-февралда Кара-Суу районунун тургуну, 47 жаштагы бир нече жолу соттолгон З.И. аттуу жаран кармалып, Араван РИИБинин убактылуу кармоочу жайына киргизилген. Учурда тергөө иштери уланууда.

Автор: Жолдубек Качкынбаев