Чүйдө аккумулятор уурдоого шектелип кармалган жарандын дагы 10 кылмышка катыштыгы бар экени такталды

Чүйдүн Аламүдүн районунда аккумулятор уурдоого шектелип, 27 жаштагы жаран колго түшүрүлдү. Ал оор жүк ташуучу унаанын эки аккумуляторун уурдоого шектелүүдө дешет облустук ички иштер башкы башкармалыгынан.

Маалым болгондой, 21-февралда Аламүдүн РИИБине 52 жаштагы жаран арыз менен кайрылган. Ал 18-февралга караган түнү MAN унаасынын 2 даана аккумуляторун белгисиз бирөө уурдап кеткенин билдирген.

Бул факты Кылмыштардын бирдиктүү реестрине 205-берене (уурдоо) менен катталып, сотко чейинки өндүрүш иштери башталган.

"Жүргүзүлгөн ыкчам издөө иш-чараларынын натыйжасында жогорудагы кылмышка шектелип 1995-жылы туулган К.К. аттуу жаран кармалып, убактылуу кармоочу жайга камакка алынды. Териштирүү учурунда шектүүнүн Аламүдүн районунун аймагында дагы ушул сыяктуу 10 кылмыш фактысына тиешеси бар экендиги аныкталды. Учурда шектүүнүн дагы башка кылмыштарга тиешеси бар же жок экендигин тактоо боюнча тергөө иштери жүргүзүлүүдө", - дешти мекемеден.

Автор: Бактыгүл Момбекова
Фото: Чүй ОИИББинин маалымат кызматы