Бишкекте тоноого шектелип кармалган 21 жаштагы жаран СИЗО-1ге камакка алынды

Бишкекте түн ичинде шаар тургунуна физикалык күч колдонуп, акчасын жана телефонун тартып алганга шектүү аныкталды. Ленин РИИБинин маалымат кызматынан белгилешкендей, окуя 18-февралда Кара-Жыгач конушунда катталган.

Анда белгисиз жаран арыз ээсине күч колдонуп, 5 миң сомдук телефонун жана 6 миң сом акчасын тартып алган. Бул факты Кылмыштардын бирдиктүү реестрине 206-берене (тоноо) менен катталып, сотко чейинки тергөө иштери башталган.

"Ыкчам тергөө иштеринин жүрүшүндө шектүү катары 1999-жылы туулган Ч.Ж. кармалып, тергөө кызматына жеткирилген. Ленин райондук соту шектүүгө карата СИЗО-1ге 1 айга камакка алуу түрүндөгү чечим чыгарды.

Учурда тергөө иштери улантылып, шектүүнүн мындан башка дагы кылмыш иштерге катыштыгы бар же жогун аныктоо боюнча амалдар аткарылууда", - дешти мекемеден.

Автор: Бактыгүл Момбекова
Фото: Ленин РИИБинин басма сөз кызматы