Панфилов районунда "адамды сабап кеткен" деген шек менен 2 адам кармалды

Чүй ОИИБинин басма сөз кызматынын 23-ноябрда берген маалыматына ылайык, бейбаштыкка шектелип 2 адам кармалды.

Милиция бөлүмүнө Чалдыбар айылынын 28 жаштагы тургуну Ш.М. кайрылган. Арыз ээси 1-ноябрда саат 23:30 чамасында мас абалындагы 2 адам үйүнүн эшик-терезелерин сындырып кирип, күйөөсү экөөнү сабап салышканын билдирген.

Аталган факты боюнча Кыргыз Республикасынын Кылмыш-жаза кодексинин 234-беренесине (бейбаштык) ылайык кылмыш иши козголду.

Иликтөө чараларынын натыйжасында Панфилов районунун тургундары 26 жаштагы Т.К. жана 25 жаштагы М.А. кармалды. Иликтөө иштери жүрүүдө.

Автор: Айпери Ганыжан кызы