Ошто көп кабаттуу үйдүн жер төлөсүндө өрт чыкты

Ошто көп кабаттуу үйдүн жер төлөсүндө өрт чыкты. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, 4-мартта саат 22:42та Ош шаарында 4 кабаттуу турак үйдүн жер төлөсүн түтүн каптап жаткандыгы тууралуу кабар түшкөн. Өзгөчө кырдаалдар министрлигинин Ош шаары боюнча башкармалыгынан ыкчам нөөмөт тартылып, газ-түтүндөн коргоо кызматынын жардамы менен түтүндө калып калган 1967-жылы туулган А.А. аттуу жаран куткарылган.

Өрт 23:00дө чектөөгө алынып, 23:05те толугу менен өчүрүлдү. Такталган маалыматка ылайык, өрттүн чыгуусуна жер төлөдө калган таштанды жана эски буюмдардын күйгөндүгү себеп болгон.

Автор: Жылдыз Джускембаева