Араванда дүкѳндѳн 8 уюлдук телефон уурдаган чет ѳлкѳлүк жаран кармалды

Араванда дүкѳндѳн 160 миң сомдук телефон уурдаган чет ѳлкѳлүк жаран кармалды. Бул тууралуу Ош ОИИБинин басма сѳз кызматынан билдиришти.

Маалыматка ылайык, 2020-жылдын 9-январында Араван районунун Тѳбѳ-Коргон айылынын тургуну К.М. аттуу жаранга таандык үй-тиричилик дүкѳнүнѳ белгисиз адам мыйзамсыз жашыруун түрдѳ терезесин сындырып кирип анын ичинен ар биринин баасы 20 миң сом болгон таңгактарга салынган 8 даана жаңы уюлдук телефондорун уурдап окуя болгон жерден изин жашырып качып кеткендиги боюнча арыз менен кайрылган.

"2022-жылдын 4-мартында бул кылмышка шектүү катары Ѳзбекстан Республикасынын жараны Анжиян облусунун жашоочусу 19 жаштагы Г.А. аттуу жаран кармалып, Кылмыштардын бирдиктүү реестрине катталып, 205-берене менен кылмыш иши козголду. Араван райондук соту тарабынан баш коргоо чарасы каралып 15 күнгѳ камакка алынды. Азыркы учурда арыз ээсине келтирилген 160 миң сомдук чыгымдын ордун толтуруу боюнча тергѳѳ амалдары жүрүп жатат", - деп жазылат маалыматта.

Автор: Жолдубек Качкынбаев