Бишкекте дүкөндөрдүн биринде өспүрүм кызды карактоого шектүү 10 күнгө камакка алынды

Бишкектеги дүкөндөрдүн биринде өспүрүм кызды карактоого шектүү кармалды. Ленин РИИБинин маалымат кызматынан кабарлашкандай, окуя былтыр ноябрь айында болгон.

Маалым болгондой, 2021-жылы 3-ноябрда шаар тургуну милиция кызматкерлерине арыз менен кайрылган. Анда 2-ноябрда саат 21:00 чамасында Москва жана Интергельпо көчөлөрүнүн кесилишиндеги дүкөнгө белгисиз адам кирип, жашы жете элек кызына физикалык күч колдонуу менен 5 миң сомун алып, изин жашырып кеткени айтылган.

Бул факты Кылмыштардын бирдиктүү реестрине 207-берене (каракчылык) менен каттоого алынган.

"Сотко чейинки тергөө иштеринин жүрүшүндө шектүү делинген 1996-жылы туулган С.Ж. кармалып, убактылуу кармоочу жайга киргизилди. Ленин райондук соту тарабынан шектүүнү СИЗО-1ге 10 күнгө камоо чечими чыкты. Учурда шектүүнүн мындан башка дагы кылмыш иштерине тиешеси бар же жоктугу текшерилүүдө", - дешти малымат кызматынан.