"Өзүмдү жаш сезип турам" дейт 60 жашка чыккан "Айкөл" тобунун негиздөөчүсү Советжан Асанкадыров

Бүгүн, 30-мартта "Айкөл" тобунун негиздөөчүсү Советжан Асанкадыров 60 жашка толду. Ырчыны өздүк майрамы менен куттуктап байланышка чыктык.

"Туулган күнүмдү түшкө чейин кесиптештерим, андан соң үй-бүлөм менен тосом. Өмүр деген учкан куштай өтө берет экен. 60 жашка чыкканда өзгөчө деле сезимдер болгон жок. Өзүмдү жаш сезип турам (күлүп). Кайрат-күчүм барда талыкпай иштей берем", - деди ал.

Көптөгөн мамлекеттик сыйлыктардын ээси, "Айкөл" тобунун негиздөөчүсү, жетекчиси Советжан Асанкадыров 1962-жылы 30-мартта Ысык-Көл облусунун Түп районундагы Көөчү айылында туулган.

Айылдагы 8 жылдык мектепти бүтүргөн соӊ Караколдогу музыкалык окуу жайга тапшырган. Андан ары окуусун Бишкектеги искусство институтунан бүтүргөн.

Эмгек жолун Караколдогу музыкалык окуу жайда мугалим болуп иштеп баштаган. Ал жактан "Айдың көл" деген жыйырма төрт кишиден турган фольклордук топту жетектеген. Көп киши менен гастролго чыгуу оорчулук жараткандыктан, бир солист үч-төрт аспапта ойной тургандай кылып топту кыскартып, 1994-жылы алты баладан турган "Айкөл" тобун түзгөн. Чыгармачылыктан тышкары Кыргыз Республикасынын улуттук маданият борборунун башкы директорунун орун басары болуп иштеген. Андан кийин Бишкек шаарындагы музыкалык мектептин директору болгон.

Учурда Бишкек шаардык мэриянын алдындагы маданият бөлүмүндө эмгектенет.

30-мартка карата жылнаама.

Автор: Жолдубек Качкынбаев