Бишкекте аялын аёосуз сабаган Түрк жараны кармалдыбы? Милиция жооп берди

Аялын аёосуз сабаган Түрк жараны кармала элек. Бул тууралуу SUPER.KG порталына Бишкек ШИИБинин басма сөз катчысы билдирди.

Маалыматка ылайык, аялын сабоого шектелген Түрк жараны кармала элек. Издөө иштери жүрүүдө.

Буга чейин бишкектик аял күйөөсү мыкаачылык менен сабаганын социалдык тармактагы баракчасына жазган. Кийин Д.М. аттуу аял Биринчи Май РИИБине күйөөсү Б.Х.га карата чара көрүү өтүнүчү менен кайрылган. Анда 14-мартта саат 00:00 чамасында Логвиненко көчөсүндө жайгашкан үйүндө аны 4 саат бою сабап, денесине залал келтиргенин жазган. Аталган факты Кылмыштардын жана жоруктардын бирдиктүү ресстрине "өмүргө жана ден соолукка кооптуу зомбулукту колдонуу менен коркутуу" берене менен катталып, кылмыш иши козголуп, тийиштүү экспертизалар дайындалган. Биринчи Май РИИБи аялын сабаган адам Түркиянын жараны экенин, учурда ал изделип жатканын кабарлашкан.

Күйөөсү тарабынан сабалган келин социалдык тармактагы баракчасына окуянын жагдайын жазып чыккан.

"Мен аны абдан коркунучтуу жана мени күн сайын сабачу деп айтуудан алысмын. Жок, албетте, жакшы учурлар, эсте каларлык кезибиз көп болгон. Бирок кеп анда эмес, акчада да эмес. Биз акыркы эки жылда бири-бирибиздин тилибизди таба алган жокпуз, ар бир майда нерселер үчүн уруштук. Акырындык менен сезимдер өчө баштады, бирок мен уулум үчүн кала бердим. Моюнга алам, аны кайра сүйүүгө аракет кылдым, бирок жүрөккө буйрук бере албайсың. Мен ага тынч эле ажырашууну сунуштадым, мени коё берүүсүн суранып жалындым. Бирок ал буга макул болгон жок. А мен жөн гана кетип калуудан корктум. Мындай мамилени башынан өткөргөндөр мени жакшы түшүнөт. Балким, анын да сезимдери акырындык менен өчүп, тынч ажырашып кетебиз деп ойлогом. Мен канчалык андан алыс болгон сайын, ал ошончолук мени таштап кеткиси келген жок. Эч себепсиз урган. Мындай кылыктарын актоого болобу? Адамды ушинтип кыйнаса болобу?", - деп жазган ал.

Автор: Жолдубек Качкынбаев