Түндүк Корея Түштүк Кореяны өзөктүк согуш менен коркутту

Түштүк Корея аскердик тирешүүгө барса Пхеньян өзөктүк курал колдонот. Бул тууралуу Түндүк Кореянын президенти Ким Чен Ындын эжеси Ким Ё Чжон билдиргенин чет элдик басылмалар жазды.

"Эгер Түштүк Корея аскердик тирешүүгө барса, анда биздин өзөктүк согуштук күчтөр сөзсүз түрдө өз милдетин аткарууга аргасыз болот", - деп билдирген ал.

Ал ошондой эле Түштүк Кореянын коргоо министринин Түндүк Кореяга каршы алдын ала сокку уруу тууралуу айтканы өтө чоң жаңылыштык болгонун белгилеген.

Буга чейин Ким Ё Чжон Түштүк Кореянын коргоо министри Со Вукту Түндүк Кореяга каршы алдын ала сокку уруу ыктымалдыгы тууралуу сөздөрү үчүн “таштанды” деп атап, мындай сөздөр Сеул үчүн кайгылуу кесепеттерди алып келерин айткан.

Автор: Азат Бейшенбеков