Таласта түн ичинде жарандарды бычак менен коркутуп телефондорун тартып алган жаран кармалды

Таласта жарандарды бычак менен коркутуп, карактоого шектүү жаран колго түшүрүлдү. Облустук ички иштер башкармалыгынан кабарлашкандай, шектүү кылмыш жасаган күнү мас абалда болгон.

Маалыматка караганда, окуя 28-мартта Талас районунун Калба айылында орун алган. Анда таштанды таштоочу жерде иштеп, чогуу жашаган 2 жаран милицияга кайрылышкан. Алар таңга маал бейтааныш адам уктап жаткан бөлмөнүн терезеси аркылуу кирип, колундагы бычагы менен коркутуп телефондорун алгандыгын билдирген.

Аталган факты Кылмыштардын бирдиктүү реестрине 207-берене менен катталып, кылмыш иши козголгон.

"Ыкчам тергөө иштеринин жүрүшүндө, Көк-Дөбө айылынын 41 жаштагы Д. Р. аттуу тургуну кармалды. Ал кылмышка барган учурда мас абалда болгондугу аныкталган. Учурда соттун чечими менен шектүү убактылуу кармоочу жайга киргизилип, тергөө амалдары жүрүп жатат", - дешет мекемеден.

Автор: Бактыгүл Момбекова
Фото: Талас ОИИБи