Бажы кызматынын төрагасы өткөн жылы эмне себептен план аткарылбай калганын түшүндүрдү

Бажы кызматына коюлган пландык сумма толук аткарылбай калганына коронавирус пандемиясына байланыштуу кирген чектөөлөр себепкер. Бул тууралуу Бажы кызматынын төрагасы Самат Исабеков билдирди.

«Былтыр 2021-жылдын планы толук аткарылбай калганы Кытай Эл республикасынан кирген товарлардын жыл башында кыскарып кеткенине байланыштуу. Былтыр январь айынан апрель айына чейин коронавируска байланыштуу кирген чектөөлөр ушундай таасирин берди», - деди Исабеков.

Бажы кызматы өткөн жылы жалпы 46 миллиард 886,5 миллион сом чогулткан. Бул коюлган пландын 97 пайызын түзгөн.

Автор: Кенжебай Сатканалиев
Фото: Кенжебай Сатканалиев