Мандарин жана күрүч. Баткенде жүктү мыйзамсыз алып өтүү аракетине бөгөт коюлду

Баткен облусунда чек арадан мыйзамсыз өткөрүлүп жаткан жүктөргө бөгөт коюлду. Бул тууралуу УКМКнын Чек ара кызматынан билдиришти.

Маалыматка ылайык, 22-апрель күнү кечинде Баткен районунун Кара-Бак айылындагы үйлөрдүн биринен чек ара кызматкерлери тарабынан 2250 килограмм селитра жана 2500 килограмм күрүч табылган. Текшерүү учурунда жүк Тажикстандын аймагына өткөрүү үчүн даярдалганы белгилүү болду.

"Мындан сырткары 23-апрелге караган түнү Баткен районунун Дөбө тилкесинде чек арачылар үйлөрдүн биринен 120 коробкага жакын мандарин табышкан.

Ал эми 23-апрель күнү эртең менен Лейлек районунун Ак-Арык тилкесинде чек ара отрядынын кызматкерлери тарабынан Мерседес-Бенц спринтер үлгүсүндөгү унаа табылды. Текшерүү учурунда Тажикстан аймагына 2000 килограмм селитра алып чыгууга аракет кылганы аныкталып, тийиштүү документтери жок болуп чыкты", - деп жазылат маалыматта.

Тиешелүү иш кагаздары толтурулгандан соң айдоочу жана баңгизатты мындан ары териштирүү иштерин жүргүзүү үчүн компетенттүү органдын кызматкерлерине өткөрүлүп берилди.

Автор: Айпери Бакталбек кызы