Бишкекте түн ичинде короодогу унааны үчөөлөп айдап качкандар кармалды

Бишкекте милиция кызматкерлери унаа уурдоого шектүү жарандарды колго түшүрдү. Биринчи Май РИИБинин басма сөз кызматынан кабарлашкандай, унаа шаар аймагынан табылды.

Шаар тургуну 20-апрелде милицияга арыз менен кайрылган. Анда 20-апрелге караган түнү саат 03:10 чамасында короодо токтоп турган унаасын белгисиз адамдар айдап кеткенин кабарлаган. Арыздануучу Хонда Фит унаасын 450 миң сом деп баалаган.

Бул факты Кылмыштардын бирдиктүү реестрине 211-берене (унаа транспорт каражаттарын айдап качуу) менен каттоого алынып, тергөө амалдары башталган.

"Териштирүү иштеринин жүрүшүндө кылмышка шектелип 2002-жылы туулган С.М., 2002-жылы туулган А.Б., 2003-жылы туулган С.М. кармалып, убактылуу кармоочу жайга киргизилди. Ал эми уурдалган унаа табылып, ээсине кайтарылды. Учурда тергөө амалдары улантылууда", - дешти маалымат кызматынан.