Ошто алдамчылыкка шектелип мурда 8 жолу соттолгон адам кармалды

Ошто жарандардын автоунааларын алдап алып, из жашырган кылмыштуу топтун мүчөсү кармалды. Бул туурасында Ош ШИИБинен билдиришти.

Билдирүүдө жазылгандай, шектүү 2021-жылдын 15-ноябрында Ош шаарынын тургунуна таандык Мерседес-Бенц үлгүсүндөгү унааны 220 миң сомго баалашып, ошол боюнча изин жашырып кеткен. Ал эми 21-ноябрь күнү дагы бир жарандын Нива-2121 үлгүсүндөгү унаасын дагы ушундай эле жол менен алып, башка бирөөгө арзаныраак сатып жиберип качып кеткен. Учурда шектүүнүн үстүнөн 4 арыз бар.

Шектүү Кара-Суу районунун 1980-жылы туулган Ч.А. аттуу тургуну кармалып, убактылуу кармоочу жайга киргизилди.

Ч.А.нын үстүнөн Кылмыш кодексинин 209-беренеси менен кылмыш иши козголуп, тергөө иштери уланууда. Тергөө иштеринин жүрүшүндө шектүү мурда 8 жолу соттолгондугу, өзү ИИМдин атайын тизмесинде уюшкан кылмыштуу топтун мүчөсү катары 2016-жылдан бери тургандыгы маалым болду.

Ош шаардык ички иштер башкармалыгынын кылмыш иликтөө бөлүмү шектүү жарандан жабыр тарткан адамдар болсо 03222-4-82-82, 0555-65-65-65 номерлери аркылуу кабарлап коюуну суранат.

Автор: Айжанар Рыспек кызы
Фото: Ош ШИИБи