Ошто атасынан калган ок атуучу куралды сатууга аракет кылган аял кармалды

Ошто мыйзамсыз курал сатууга аракет кылган аял кармалды. Бул тууралуу Ош ШИИБинин басма сөз кызматынан билдиришти.

Маалыматка ылайык, 5-май күнү Ош шаарынын аймагында Н. аттуу аял белгисиз үлгүдөгү ок атуучу куралды сатуу максатында мыйзамсыз сактап жүргөндүгү аныкталган.

Аталган факты Кылмыш-жаза кодексинин 267-беренеси менен Ош ШИИБинде катталып, кылмыш иши козголгон.

"Жүргүзүлгөн издөө иш-чараларынын жүрүшүндө 1963-жылы туулган Н.С. аттуу аял ок атуучу 5.6 миллиметр калибрдеги "ТОЗ-16" үлгүсүндөгү сайлуу мылтыкты 90 миңге баалап, сатууга аракет кылып жаткан жеринен кармалды. Шектүү ок атуучу курал маркум атасынан калгандыгын жана акча зарыл болгондугунан мындай аракетке барганын билдирди", - деп айтылат маалыматта.

Учурда ок атуучу куралга соттук-баллистикалык экспертизалар дайындалып, териштирүү иштери улантылууда.

Автор: Айпери Бакталбек кызы