Бишкекте 11 адам жабыркаган жол кырсыгы болду

Бишкекте жол кырсыгы катталып, 11 адам жабыркады. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, Бишкектин Ахунбаев жана 7-Апрель көчөлөрүнүн кесилишинде үч унаа кагылышкан. Анда DАF үлгүсүндөгү оор жүк ташуучу унаа, Honda Fit жана Mercedes-Benz Sprinter жүргүнчү ташуучу унаалардын катышуусунда жол кырсыгы катталган.

Кырсыктын кесепетинен 11 киши ар кандай жаракат алышкан.

Жерине Бишкек шаардык Куткаруу кызматынан 5 куткаруучу тартылган.

Куткаруучулар Honda Fit унаасынын ичинде кыпчылып калган аялды чыгарышкан жана жабыркаган жарандарга биринчи тез жардам көрсөтүп, "Тез жардам" кызматына өткөрүп беришкен.

Автор: Кенжебай Сатканалиев