Бишкекте 38 жаштагы жаран телефон уурдап жаткан жеринен колго түшүрүлдү

Бишкекте телефон уурдоого шектелген жаран колго түшүрүлдү. Бул тууралуу Ленин РИИБинин басма сөз кызматынан билдиришти.

Маалыматка ылайык, 15-май күнү саат 17:50 чамасында Ленин РИИБинин кызматкерлери борбор калаадагы Бүбүсара Бейшеналиева көчөсүндө жайгашкан супермаркеттердин биринен уурулукка шектүү жаранды кармашкан. Ал ачык түрдө шаар тургунунун баасы 5 миң сомдук "Redmi 6A" үлгүсүндөгү телефонун уурдап алган жеринен колго түшүрүлгөн.

Окуя болгондон көп өтпөй телефондун ээси У.Э аттуу жаран милицияга арыз менен кайрылган. Аталган факты боюнча 206-беренеге ылайык (уурулук) кылмыш иши козголгон.

Кылмышка шектүү 1984-жылы туулган С.Ж. убактылуу кармоочу жайга киргизилип, анын башка ушул сыяктуу кылмыштарга тиешеси бар же жок экендигин аныктоо үчүн кошумча тергөө иш-амалдары жүргүзүлүп жатканы маалымдалды.

Автор: Жанбулат Жумабеков