"Буга чейин туулган күнүмдө 30 киши чакырып той кылчумун" дейт 33 жашка чыккан ырчы Азалия Дүйшөналиева

Бүгүн, 18-майда ырчы Азалия Дүйшөналиева 33 жашка толду. Жакында эне статусун алган ырчы менен байланышканыбызда, бул ирет туулган күнү өзгөчө болуп жатканын айтат.

"Бул туулган күнүм мен үчүн өзгөчө. Кучагымда кызым бар, сүйүктүү жолдошум жанымда. Кызымдын жытына мас болуп эле жатабыз. Буга чейин туулган күнүмдө 30 киши чакырып той кылсам, эми ал нерсенин да кереги жок. Кичинекей үй-бүлөмдүн курчоосунда майрам болуп жатат. Азыр үйдөбүз. Жолдошум "белек берем, өзүң танда" деп жатат. Зер буюм алып берет окшойт. Андан кийин сейилдеп келебиз", - дейт ырчы.

Азалия Дүйшөналиева 1989-жылы Бишкек шаарында туулган. 2009-жылы Сайкал Садыбакасова менен таанышып, андан соң "Кыз-Бурак" тобунда ырдап калганын айтканы бар. 2017-жылдан бери жеке ырчы катары ырдап жүрөт.

Ал эл аралык сулуулар сынагына да катышкан. Тагыраагы, Малайзиянын Куала-Лумпур шаарында өткөн "Miss Cosmopolitan World-2018" сынагына, Египетте өткөн "Miss Eco International" сулуулук сынагына катышкан. Репертуарында "Жаным ай", "Өмүр белеги", "Жаныңда", "Алыстадым" аттуу ырлары бар.