Ырчы Гүлнур Асанова: "Мага куру доомат коё беришсин, бирок энемди, эжемди тынч коюшсун"

Бир күндөн бери ырчы, дастанчы, актриса Гүлнур Асанова социалдык тармактын колдонуучулары тарабынан сынга алынууда. Анын сынга кабылуусуна Фейсбук баракчасына жазган билдирүүсү себеп болгон. Дин жолуна түшкөн ырчы хадистердин бирин жеке баракчасына жазып калтырган.

Интернет колдонуучулар дароо эле реакция кылышып, Гүлнур Асанованы сынга алып киришти.

"Мен жазсам, Куран аятынан жана хадистен алып гана жазам. Өзүмдүн оюмдан токуп жазганга акым дагы жок! Акылым, жан дүйнөм ага жол бербейт. Мен эки нерсе жөнүндө Куран аятынан жана хадистен алып жаздым. Биринчиси, ойноштук, зынаа. Экиничиси, ушак чыгарган адам жөнүндө. Муну жазуумдун себеби - далили жок ушак чыгарып, бирөөгө доомат коюп жаткандарга карата жазылган.

Ал эми менин сөзүм кылып, сунуш киргизди дегендерге жол болсун. Алар өздөрүнүн деңгээлин гана көрсөтүп жатышат. Куран барактарын барактап, хадис китептерин бетин ачпаганын далилдеп коюшту. Менин атымды жазып, куру доомат коё беришсин, бирок энемди, эжемди тынч коюшсун. Бул өтө эле аша чапкандык!

Мага зулум кылгандардын баарын Аллахка салдым", - дейт ырчы менен байланышканыбызда.

Автор: Бактыгүл Момбекова