Колу байланган абалда табылган. Чүйдө кошуналар чырдаша кетип, бири экинчисине залал келтирди

Чүй облусунун Сокулук районунда 45 жаштагы жаран денесинен ар кандай жаракаттарды алып, колу байланган абалда табылды. Бул туурасында облустук ички иштер башкы башкармалыгынан кабарлашты.

Маалым болгондой, 8-июнда Сокулук РИИБинин нөөмөт бөлүмүнө Күн-Туу айылы жакта колу байланган жаран табылгандыгы тууралуу маалымат түшкөн.

Ыкчам тергөө тобу жабыркаган жаран 1977-жылы туулган Т.М. экендигин такташты. Жабырлануучуга алгачкы медициналык жардам көрсөтүлүп, андан соң аймактык ооруканага жеткирилди.

Бул факты 130-берене (ден соолукка оор залал келтирүү) менен Кылмыштардын бирдиктүү реестрине катталды.

"Жүргүзүлгөн ыкчам издөө иш-чараларынын натыйжасында, кылмышка шектелип Б.Н. аттуу жаран колго түшүрүлдү.
Иликтөө иштеринин жүрүшүндө окуя кошуналардын ортосундагы чыр-чатактан улам болгону аныкталды. Учурда кармалган адам Сокулук РИИБинин убактылуу кармоочу жайына киргизилип, бардык керектүү экспертизалар дайындалып, сотко чейинки териштирүүлөр уланууда", - дешет маалымат кызматынан.

Автор: Бактыгүл Момбекова
Фото: Чүй ОИИББинин маалымат кызматы