Абактагыларга баңгизат ташып жүргөн жаран кармалды

Бишкек шаарынын жана Чүй облусунун аймактарындагы абактарга баңгизат ыргытуучу каналдарды жоюу боюнча атайын операция өткөрүлдү. Бул тууралуу ИИМдин басма сөз кызматынан билдиришти.

Маалыматка ылайык, 6-май күнү саат 01:00дө караул ротасы Чүй облусунун аймагындагы абактардын бирине белгисиз жарандар эки баштыктагы өзгөчө жыттанган, боз-жашыл түстөгү гашиш баңгизатын ыргытканын байкап калышкан.

Соттук-химиялык экспертизанын корутундусуна ылайык, аталган зат 982 грамм салмактагы гашиш баңгизаты экени аныкталган.

"Иликтөө иш-чараларынын жүрүшүндө, бул кылмышты буга чейин бир нече жолу соттолгон, абактарга ири өлчөмдөгү баңгизаттарды ташып киргизүү менен алектенген Арс каймана аттуу жаран жасагандыгы белгилүү болгон. Кармалган жаран Токмок шаарынын 1989-жылы туулган Ж.А. аттуу тургуну экени такталды. Ал абактарга гашиш баңгизатын ыргытып жүргөндүгүн моюнуна алды", - деп жазылган маалыматта.

Автор: Айзада Кыдырмышева