Ооганстандын жараны өзгөчө ири өлчөмдөгү баңгизат менен кармалды

Баңгизаттарды жеткирүү каналын уюштурууга тиешеси бар Ооганстандын М.И.К. аттуу жараны кармалды. Бул тууралуу ИИМдин басма сөз кызматынан билдиришти.

Маалыматка ылайык, шектүүдөн өзгөчө ири өлчөмдө ооган тектүү баңгизаттар табылган. Алар 6 килограмм 942 грамм героин жана 9 килограмм 550 грамм гашиш болгон. Кармалган адам баңгизаттарды Орусияга, андан ары Европа өлкөлөрүнө ташуу жана сатуу үчүн Кыргызстандын аймагына кирүүнү пландаштырган.

"Аталган факты боюнча Кылмыш-жаза кодексинин 282-беренеси (баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча сотко чейинки териштирүү башталды.

Кармалган адам Баткендин Кадамжай райондук милициясынын убактылуу кармоочу жайына киргизилип, анын аты-жөнүн тактоодо деструктивдүү диний агымды жактаган адам экендиги аныкталган", - деп жазылат маалыматта.

Автор: Айзада Кыдырмышева
Фото: ИИМдин басма сөз кызматы