Таң эрте Бишкектеги кампадан чыккан өрт толугу менен өчүрүлдү

Бишкекте кампадан чыккан өрт толугу менен өчүрүлдү. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, бүгүн, 22-июнда Аламүдүн районуна караштуу Пригородное айылынын Садовая көчөсүндөгү кампадан өрт чыккан. Өрттү өчүрүүгө ӨКМдан жалпы 7 өрт өчүрүүчү бөлүм тартылган.

Кампадан чыккан өрт эртең мененки саат 08:08де чектөөгө алынган. Бул кампада күнүмдүк колдонулуучу антисептик, косметика жана дары-дармек каражаттары сакталган.

Ошол эле катарда тамак-аш азыктары жана кир жуучу каражаттар сакталган кампаны өрт өчүрүүчү-куткаруучулар өз убагында өрттөн сактап калышты. Өрт чыккан кампанын аянты болжол менен 1 миң 500 чарчы метрди түзгөн.

Тилсиз жоо саат 14:04тө толук өчүрүлдү. Кырсыктын кесепетинен жабыркагандар жана каза болгондор жок.

Автор: Айзада Кыдырмышева
Фото: ӨКМ