Узундугу 60 метр. Баткенде Өзбекстан менен байланыштырган жер алдындагы тоннель табылды

Баткен облусунун Кадамжай районунун Кайтпас айылында коңшу өлкө менен байланышты камсыздаган тоннель аныкталды. Улуттук коопсуздук мамлекеттик комитеттин маалымат кызматынан кабарлашкандай, жер алдындагы өтмөк 24-июнда табылды.

"Тоннель Өзбекстан менен чектешкен мамлекеттик чек ара сызыгынын астынан өтөт. Болжолдуу түрдө бул тоннель контрабандалык эл керектөөчү товарларды, курал-жарактарды, ок-дарыларды, мыйзамсыз миграцияны, накталай акчаларды жана баңгизаттарды ташуу үчүн колдонулган.

Ал эми үйдүн ээси Ош облусунда туулган У.С.И. экени аныкталды. Жер алдындагы жолдун туурасы 1,5 метр, бийиктиги 2,1 метр, кыргыз-өзбек чек арасына чейинки узундугу 60 метрди түзөт.

Азыркы учурда бардык зарыл болгон ыкчам-тергөө иш-чаралары жүргүзүлүүдө", - дешет маалымат кызматынан.

Автор: Бактыгүл Момбекова
Фото: УКМКнын маалымат кызматы