Улуттук "Манас Ордо" комплексинин кызматкерлери мамлекетке 20 миллион сомдон ашык зыян келтирген

Улуттук "Манас Ордо" комплексинин кызматкерлери мамлекетке 20 миллион сомдон ашык зыян келтирген. Бул тууралуу Башкы прокуратуранын басма сөз кызматынан билдиришти.

Маданият, маалымат, спорт жана жаштар саясаты министрлигинин ички аудиттик текшерүүсүнүн жыйынтыгында Улуттук “Манас Ордо” комплексинде олуттуу каржылык мыйзам бузуулар аныкталган. Аудиттик текшерүүдө 2020-2021-жылдары республикалык бюджеттен, ошондой эле атайын эсептен комплекстин кызматкерлерине материалдык жардам, үстөк акы, эмгек өргүү акысы, эмгек стажысы жана кызматкерлердин ден соолугуна келтирилген залал үчүн акча каражаты ашыкча төлөнүп берилгендиги белгилүү болгон.

Мындан тышкары, тендердик сатып алууда, электр энергиясы үчүн төлөмдөрдө, мекеменин муктаждыктары үчүн автотранспорт каражаттарын сатып алууда президенттин резервдик фондунан бөлүнгөн каражаттарды максатсыз пайдаланышкан.

Натыйжада "Манас Ордо" комплексинин жооптуу адамдары тарабынан мамлекетке келтирилген чыгымдын жалпы суммасы 20 миллион 659 миң 300 сомго жеткендиги маалымдалды. Аталган факты боюнча Талас облустук прокуратурасы тарабынан Кылмыш-жаза кодексинин 337-беренеси (Кызматтык абалынан кыянаттык менен пайдалануу) менен кылмыш иши козголгону жана тергөө иш-амалдары жүргүзүлүп жатканы кабарланды.

Автор: Жанбулат Жумабеков