Бишкекте бүтүрүүчүлөрдүн аттестат алуу аземине байланыштуу блок посттор коюлат

Бүгүн түштөн кийин шаардан чыгуучу чоң көчөлөрдө блок посттор орнотулуп, өспүрүмдөр менен бара жаткан бардык унаалар текшерилет. Бул туурасында милициянын кайгуул кызматынан маалым болду.

Билдирүүгө ылайык, бүгүн Бишкек шаарындагы мектептерде 11-класстын бүтүрүүчүлөрүнүн орто мектепти бүткөндүгү боюнча аттестат алуу аземи өтүп жатат.

"Буга байланыштуу кыйгуул кызматкерлери ар бир орто мектептерде коомдук коопсуздукту жана жол кыймылынын коопсуздугун камсыздоо, ошондой эле өспүрүмдөр катышкан кылмыштарга, укук бузууларга, ичкилик, баңгилик өңдүү ар кандай терс көрүнүштөргө жол бербөө максатында күчөтүлгөн тартипте иш алып барууда.

Андан сырткары бүтүрүүчүлөр иш-чара бүткөндөн кийин ата-энелеринин жана чоң адамдардын коштоосу жок өз алдынча топтошуп, тоого же эс алуучу жайларга чыгып кетпеши үчүн түштөн кийин шаардан чыгуучу чоң көчөлөрдө атайын блок посттор орнотулат. Өспүрүмдөр менен бара жаткан бардык унаалар текшерилет.

Андыктан ата-энелерди балдарын кароосуз калтырбай, көзөмөлдөп турууга чакырабыз", - деп айтылат маалыматта.

Автор: Айпери Бакталбек кызы
Фото: Милициянын кайгуул кызматы