Бишкекте кайгуул кызматкерлерине баш ийбей тээп салган жаранга 7500 сом айып салынды (видео)

Бишкекте кайгуул кызматкерлерине баш ийбей, каршылык көрсөткөн айдоочуга 7500 сом айып салынып, өзү милиция бөлүмүнө жеткирилди. Автоунаасы төлөнбөгөн айып пулдары үчүн айып короо жайына токтотулду. Бул тууралуу Милициянын кайгуул кызматынан билдиришти.

Кайгуул кызматкерлери бөлүнгөн аймакта кайгуулда жүргөн учурда болжол менен саат 13:30 чамасында Киев жана Исанов көчөлөрүнүн кесилишинде жол эрежесин бузган Мерседес-Бенц үлгүсүндөгү автоунааны токтотушкан.

Бирок айдоочу кызматкерлерге баш ийбей качкандыктан артынан кууп, Киев жана Абдрахманов көчөлөрүнүн кесилишинен кысып токтотушкан.

Ошол учурда да унаанын 1994-жылы туулган Г.Н. аттуу айдоочусу кызматкерлерге карата каршылык көрсөтүп, бир-эки жолу тээп да салган.

Бирок жыйынтыгында айдоочуга карата баш ийбегендиги жана качуу учурунда жол эрежелерин бузгандыгы үчүн 3 протокол толтурулуп, жалпысынан 7500 сом айып салынган. Ошондой эле унаасы айып короо жайына токтотулган.

Ал эми кызматкерлерге карата каршылык көрсөткөндүгү үчүн тийиштүү чара көрүү максатында Биринчи май райондук ички иштер бөлүмүнө жеткирилген.