Бишкекте издөөдө жүргөн уюшкан кылмыштуу топтун мүчөсү кармалды

Алдамчылык аракеттери үчүн издөөдө жүргөн жаран кармалды. Бул тууралуу ИИМдин басма сөз кызматынан билдиришти.

Маалыматка ылайык, милиция кызматкерлери ыкчам-иликтөө иш-чараларын жүргүзүү учурунда алдамчылык фактысы боюнча издөөдө жүргөн жаранды кармашты.

Кылмыш ишинин алкагында Октябрь районунун сотунун токтомунун негизинде, Жалал-Абад облусунун жашоочусу К.С. аттуу жаранга карата издөө жарыяланган. Ички иштер органдары тарабынан издөөдө жүргөн жарандын кайда экендигин аныктоо жана аны кармоо боюнча ыкчам иш-чаралар жүргүзүлө баштаган.

Жогоруда көрсөтүлгөн жаран бир нече жолу соттолгон жана уюшкан кылмыштуу топтордун биринин активдүү мүчөсү катары ИИМдин ыкчам каттоосунда турат. Шектүүнү кармоо иш-чарасы Бишкек шаарынын аймагында жүргүзүлгөн.

Автор: Айзада Кыдырмышева