Ош облусунда жол кырсыгынан акыркы 8 айда 19 өспүрүм каза тапты

Ош облусунда ушул жылдын 8 айында жол кырсыгынан улам 19 өспүрүм каза болду. Бул тууралуу SUPER.KG порталына Ош облустук жол кыймылынын коопсуздугун камсыздоо бөлүмүнөн маалымдашты.

Маалыматка ылайык, 2022-жылдын 8 айында Ош облусунун аймагында өспүрүмдөр кабылган 131 жол кырсыгы катталды. Анын кесепетинен 19 өспүрүм каза болуп, 142 өспүрүм денелеринен ар кандай жаракат алышкан. 2021-жылдын ушул күнүнө салыштырмалуу өспүрүмдөр кабылган жол кырсыктары 13 учурга кыскарып, жараат алгандардын саны 17 учурга кыскарган.

Ош облусунун аймагында 551 орто мектеп бар. Быйыл облустун орто мектептеринде 260 миңден ашуун окуучу билим алышат. Ал мектептерде облустук жол кыймылынын коопсуздугун камсыздоо бөлүмүнүн 135тен ашык кызматкерлери иш алып барышат.

Автор: Бек Оморбеков
Фото: Интернеттен алынды