Кыргызстанда экстремисттик идеологияны жайылтып жүргөн чет элдик жаран кармалды

Диний-экстремисттик идеологияны жайылтып жүргөн чет элдик жаран кармалганын Улуттук коопсуздук мамлекеттик комитетинен билдиришти.

Кабарлангандай, чет мамлекеттин Ч.Д. аттуу жараны 8-сентябрь күнү колго түштү. Ал 2018-жылдан бери диний-экстремисттик идеологияны гана жайылтпастан, Кыргызстандын аймагында мыйзамсыз жашап жүргөн.

"Тинтүү иш-чараларынын натыйжасында, анын убактылуу жашаган жеринен ноутбуктар, электрондук алып жүрүүчүлөр, банк карталары, көп сандагы телефондор жана сим-карталар, ошондой эле тергөөгө тиешелүү материалдар табылып алынды", - деп айтылат атайын кызматтын билдирүүсүндө.

Кармалган адам УКМКнын убактылуу кармоо жайына киргизилип, ага карата тергөө иш-чаралары жүргүзүлүүдө.

Автор: Максуда Кудайбердиева