Ош шаарынын күнү быйыл шаан-шөкөт менен белгиленбейт

Ош шаарынын күнү быйыл жылдагыдай шаан-шөкөт менен белгиленбейт. Бул тууралуу SUPER.KG порталына Ош шаардык мэриясынан билдиришти.

Мындай чечим Баткендеги кыргыз-тажик чек арасындагы соңку окуяларга байланыштуу кабыл алынган.

"Майрамга карата "Байыркы шаардын баяны" аттуу чакан сынак гана уюштурулат", - деп айтылат билдирүүдө.

"Акындар ырында байыркы Ош шаарынын тарыхый-маданий баалуулуктарын, көркөм жана кооз жерлерин даңазалашы керек. Ырлар мурда сынакта окулбаган жана эч жерде жарыяланбаган болушу шарт", - деп жазылган маалыматта.

Ош шаарынын туулган күнү 5-октябрда белгиленет. Бул күнү калаа 3022 жашка толот.

Автор: Максуда Кудайбердиева