Ала-Белде Mercedes-Benz менен Honda Stream унаалары сүзүшүп 7 адам каза болду

Ала-Бел ашуусунда катталган жол кырсыгы 7 адамдын өмүрүн алды. Бул тууралуу SUPER.KG порталына Жалал-Абад облустук жол кыймылынын коопсуздугун камсыздоо башкармалыгынан билдиришти.

Маалыматка ылайык, кырсык кечээ, 13-октябрь күнү саат 17:10 чамасында болгон. Анда Mercedes-Benz унаасы Бишкекти көздөй келе жатып, каршы тилкеде келе жаткан Honda Stream унаасын сүзгөн. Кырсыктын кесепетинен эки унаанын айдоочусу жана 4 адам окуя болгон жерден каза болуп, дагы бир адам Токтогул райондук ооруканасында өзүнө келбей көз жумган.

Учурда бул боюнча тиешелүү экспертизалар дайындалып, тергөө амалдары жүрүүдө.

Автор: Азат Бейшенбеков