Ош шаардык РЭТ кызматкерлерине карата кылмыш иши козголду

Ош шаардык прокуратурасы тарабынан Ош райондук электр тармактар ишканасында коррупцияга каршы аракеттенүү жөнүндө мыйзамдын аткарылышы боюнча текшерүү жүргүзүлдү. Бул тууралуу Башкы прокуратуранын басма сөз кызматынан билдиришти.

Текшерүүдө Ош райондук электр тармактар ишканасынын (Ош РЭТ) кызмат адамдары иш жүзүндө аткарылбаган жумуштар боюнча расмий документтерге билип туруп жалган маалыматтарды киргизүү менен 2020-2021-жылдар аралыгында электр жабдуулары жана материалдык баалуулуктар негизсиз чыгымдалып, ишенип берилген каражаттарды өздөрүнүн кызыкчылыктарына иштетип жиберишкендиги аныкталган.

Натыйжада мамлекетке жалпы 1 миллион 372 миң 476 сомдук зыян келтирилген.

"Бул факты боюнча Ош шаардык прокуратурасы тарабынан шаардык РЭТнин жооптуу кызматкерлерине карата Кылмыш-жаза кодексинин 210-беренеси ("Ишенип берилген мүлктү ыйгарып алуу же коротуу") менен кылмыш иши козголуп, тергөө амалдары жүргүзүлүүдө", - деп билдиришти Башкы прокуратурадан.

Автор: Азат Бейшенбеков