Мамлекеттер аралык издөөдө жүргөн жаран Оштон кармалды

Ошто экстремисттик ишмердүүлүгү үчүн мамлекеттер аралык издөөдө жүргөн жаран кармалды. Бул тууралуу Улуттук коопсуздук боюнча мамлекеттик комитеттен билдиришти.

УКМКнын маалыматы боюнча, кармалган жаран Европанын бир нече өлкөсүндө “Хизб-ут-Тахрир” уюмунун окутууларын дистанттык түрдө жүргүзүп келген.

"Хизб-ут-Тахрир" диний-экстремисттик уюмунун активдүү ишмери, экстремисттик ишмердүүлүгү үчүн мамлекеттер аралык издөөдө жүргөн М.М. аттуу чет элдик жаран Ош шаарынын аймагынан кармалды. Атайын кызматтардын маалыматы боюнча, аталган чет элдик жаран Европа өлкөлөрүндө (Украина, Чехия, Швеция жана Польша) жашаган “Хизб-ут-Тахрир” маалымат каражаттарынын кызматкерлери менен байланыш түзүп, «Хизб-ут-Тахрир» уюмунун жактоочуларын дистанттык түрдө жалдоо жана окутуу менен активдүү алектенип, Фергана өрөөнүндөгү экстремисттик ишмердүүлүгүн координациялап, Кыргыз Республикасынын аймагында коңшу мамлекеттин укук коргоо органдарынан жашырынып жүргөн", - деп билдиришти УКМКдан.

Кармалган жаран УКМК тергөө камак жайынын убактылуу кармоочу жайына киргизилди. Кармалган адамдын Кыргыз Республикасынын аймагында башка кылмыштарга катыштыгы текшерилгенден кийин, белгиленген тартипте өлкөсүнө экстрадицияланат.

Автор: Азат Бейшенбеков