Мына ошентип саналуу күндөрдөн кийин Жолборс жылын узатып, Коён жылын тосуп алуу алдында турабыз. 2022-жылды узатуу алдында SUPER.KG порталы адаттагыдай эле кыргыз шоу-бизнес өкүлдөрүнүн арасынан өз бактысын таап, түбөлүккө кол кармашкандарды чогултуп чыкты. Анда сөз башынан болсун!
Жыл жаңырары менен ырчы Адилет Азимов өзүнүн продюсери Зарина Кыдыралиевага баш кошту. Үлпөт той 29-январда борборубуздагы тойканалардын биринде болуп өткөн.
"Ата-энем үйлөн деди, той тез эле болуп кетти. Биз, Зарина экөөбүз 3 жылдан ашык сүйлөштүк, андан кийин баш коштук. Мен жубайымдын тыңдыгына арбалдым", - деген ырчы мырза.
Эки жашка ырчылар Айбек Карымов менен жубайы Гүланда өкүл ата, өкүл апа болуп шайланышкан.
Актёр, вайнер Бектур Усенов сүйүктүүсү Айзатка баш кошуп, чоң турмушка кадам таштаган.
"Мен алгач Айзатты бийлеп жүргөндө көрүп калып "ии, сонун кыз экен" деп койгом. Ал убакта одноклассник белгилүү болчу. Анан Айзатты издеп ошол жактан жазгам, тилекке каршы жооп бербей койгон", - деген Бектур Усенов.
Кыргыз элинин эрке баласы, ырчы Мурадил Данияров сүйүктүүсүнүн колун сурап, таттуу түгөйлөрдүн катарын толуктады.
"Келинчегимдин аты Мээрим. Үч жолу көрүп эле байланып калдым", - деген ал SUPER.KG'ге берген маегинде.
Актёр, тамашоучу, вайнер Шумкар Бейшеналиев да бул жылы бойдокчулук менен кош айтышты. Ал "Перекупщик", "Бажалар", "Понт", "Доске" жана башка тасмаларда роль жараткан.
Ырчы Аяна Касымованын сүйүктүүсү колун сурап, ырчы июнь айында турмуш жолуна аттанган.
Актриса Айгерим Саматова да бул жылы турмуш жолуна аттанды. Ал ырчы Мадияр Руслановго турмушка чыгып, жылдыздуу түгөй аталышты.
"Мадияр аябай камкор, боор тартып турат. Мындай сапат көп эле мырзаларда боло бербейт. Мадиярдын боорукерлигин сыйлайм, баалайм. Мен эркектен алчу мээримди, сезимдердин баарын Мадиярдан ала алдым десем болот. Азыр бул адам мага бир тууганым, атам, досум, сырдашым дагы болуп калды", - деген актриса маектеринин биринде.
Узап бара жаткан жылда "Акыркы сабак" сериалынын башкы каармандары Кутман Айылчиев менен Океана Урматбек да жаш жубайлардын катарын толуктады. Эки жашка кош жылдыздар Аваз Акимов менен Айдана Дека өкүл ата, өкүл апа болуп шайланды.
Ага улай "Супер Малина" тасмасында роль жараткан актёр, блогер Медер Нуркадыров менен Нуриза Бектурова дагы баш кошушту.
"Биз 7 жыл сүйлөшүп, бири-бирибизди жакындан таанып баш кошуп жатабыз", - дешкен анда жаш жубайлар.
"Ак шумкарым", "Жоогазын" жана башка ырлары менен таанылган, белгилүү ырчы Фарида Карбозова бул жылы турмуш жолуна аттанды.
Ырчынын үлпөт тою 30-сентябрда Бишкектеги тойканалардын биринде болду. Тойго ырчынын жакындары, санаалаштары жана шоу-бизнес өкүлдөрү катышкан.
Кино жана театр жылдыздары Арнис Кыдырмышев менен Альбина Имашова тун кызы Мадаленаны турмуш жолуна узатышты. Ал актёр, вайнер Нуркул Адылбековдун келинчеги болду.
Белгилей кетсек, жаш жубайлар "Кайрат таксист" киносуна тартылган учурда сезимдери ойгонгондугун билдиришкен.
Актёр, вайнер Улан Эсенакунов сүйүктүүсүнүн колун сурап, бул жылы түгөйлөрдүн катарын толукташты.
"Сүйүктүүмдүн аты Нуриза. Чаткалдын кызы болот. 5 айдан бери тааныш болуп жүрүп, 3 айдын ичинде үйлөнүү чечимин кабыл алдык", - деген актёр.
Ырчы Кызсайкал Кабылованын туулган күнүндө сүйүктүүсү колун сурап, түгөйлөр ноябрь айында чоң турмушка кадам ташташты.
"Качан турмушка чыгасың? Жигитиң барбы?" деген суроолорго биротоло чекит коё турган убакыт келиптир да көрсө. Мен макулдугумду бердим. Жигитим эмес, жолдошум бар деп айтайын деп калчу эмес белем", - деген ырчы.
Алып баруучу, шоумен Максат Надырбеков сүйүктүүсүнө баш кошту.
"Сүйүктүүмдүн аты Алина. Көлдүн ак куусу, 25 жашта. Биз бир жарым жылдан ашык убакыт сүйлөшүп жүрүп баш кошуу тууралуу чечимди кабыл алдык", - деген Надырбеков.
Жакшы тилек менен чоң турмушка кол кармашып аттанган түгөйлөргө бакыт каалоо менен биргеликте, кирип келе жаткан Коён жылында ар биринин үйүндө наристе үнү жаңырышына тилектешпиз.
