Айып пул төлөбөй койгон уюшкан кылмыштуу топтун мүчөсү 3 жылга кесилди

Соттун чечимине баш ийбеген уюшкан кылмыштуу топтун мүчөсү кармалды. Бул тууралуу бүгүн, 28-декабрда Ички иштер министрлигинен кабарлады.

Маалыматка ылайык, издөөгө алынган Араван районунун 1997-жылы туулган М.У. аттуу тургуну мурда бир нече жолу соттолгон жана уюшкан кылмыштуу топтун мүчөсү катары ИИМдин ыкчам каттоосунда турат.

“Ал буга чейин ок атуучу куралды мыйзамсыз сактоого айыпталып кармалган. Соттун токтомуна ылайык, М.У.га карата 210 миң сом айып салынган. Ушул күнгө чейин М.У. айып пулду төлөбөгөндүгүнө байланыштуу сот бөгөт чарасын 3 жылга эркинен ажыратуу чечимин кабыл алды”, - деп айтылат маалыматта.

Автор: Бек Оморбеков
Фото: ИИМдин маалымат кызматы