"1,3 миллион сом зыян". Нарында бажы мыйзамын бузуу фактысы аныкталды

Нарында бажы мыйзамын бузуу фактысы аныкталды. Бул тууралуу Мамлекеттик бажы кызматы кабарлайт.

Маалымдалгандай, "А. X." ЖЧКсына 2018-жылы Liebherr R 914 үлгүсүндөгү сүзгүчү бар чынжыр дөңгөлөктүү экскаватор келгенин жана убактылуу ташып келүү жол-жобосу боюнча бажылык тариздөөдөн өткөнү аныкталды.

"Аталган транспорттук каражат ЕАЭБдин аймагынан тышкары чыгарылбастан жана андан ары бажылык тариздөөсүз Кыргызстанда жайгашкан", - деп айтылат билдирүүдө.

Муну менен аталган ишкана өлкө бюджетине 1 миллион 314 миң 588 сом өлчөмүндө зыян келтирген.

Бул факты боюнча чогултулган материалдар процессуалдык чечим кабыл алуу үчүн Башкы прокуратурага өткөрүлүп берилди.

Автор: Максуда Кудайбердиева